Die Martis tertio mensis Maii anno bismillesimo decimo sexto
« Solarem Impulsum Alterum » terram attigisse die Martis Phoenice in Arizona, qui locus decima fuit terrarum circuitus, itinere sedecim horarum Franciscopoli confecto, auctores illius incepti nuntiaverunt.
Qui aerius apparatus vi solari actus Parente Dorcadis (Arabice Abu Dhabi) profectus erat mense Martio anni bismillesimi decimi quinti, quo gubernatores qui eum vicissim moderantur, Andreas Borschberg et Bertrandus Piccard, sui circuitus trans terras finem facere sperant.
